Plantun de Prouvènço

Pèr coumpara dos planto d'encò nostre

Cotinus coggygria & Stellaria media

Pevoulié

Cotinus coggygria

Anacardiaceae

Àutri noum : Bos jaune, Baiso-ma-mìo, Fustet, Parouvié, Sumac.

Noms en français : Arbre à perruques, Fustet.

Descripcioun :
Lou pevoulié es un aubret eisa de recounèisse emé soun enflourejado plumouso e si fueio óuvalo e verdalo. Trachis sus li pendis roucaious e lis esboudèu de colo e basso mountagno.

Usanço :
La rusco de pevoulié servié à rusca lou cuer coume aquelo dóu fàuvi, Rhus coriaria, e li fueio pèr tencha en jaune la lano. O. Madon raporto que servié peréu pèr sougna li lapin : "Lei lapin an uno malautié qu'apèlon lou gros ventre. Alor lei gènt ié dounavon de pevoulié pèr lou faire passa... l'escorço, pas li fueio... uno brancho. Falié vèire, levavon touto la pèu, lou rasclavon, pèr manja l'escorço" (op.cit. p. 57).

Port : Aubret
Taio : Pancaro entresigna
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Cotinus
Famiho : Anacardiaceae

Coulour de la flour : Jauno
Petalo : 5
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Basso mountagno - Roucaio - Esboudèu - Colo
Estànci : Mesoumediterran à Coulinen
Couroulougi : Pancaro entresigna
Ref. sc. : Cotinus coggygria Scop., 1771

Mourihoun

Stellaria media

Caryophyllaceae

Àutri noum : Paparudo, Trisseto, Esteleto, Bourassou.

Noms en français : Mouron des oiseaux, Morgeline.

Descripcioun :
Erbo basso coumuno à mita couchado que fai de pichòti flour blanco que sèmblon d'estello. Li petalo soun fendasclado sus quàsi touto la loungour, li fueio soun un pau pounchudo, óupousado, aquéli d'en bas emé un pecoui au contro de li d'en aut.

Usanço :
Maugrat que caup un pau de sapounino lou mourihoun pòu rintra dins l'ensalado champanelo. Pamens vau mies lou culi quouro flouris pèr pas s'engana emé lou mouroun rouge (o blu), Anagalis arvensis, qu'èi bèn mai dangeirous (caup de ciclamino). Lou mourihoun èi vertuous contro li proublèmo de pèu e ajudo à lucha contro li mau d'os e mai encaro.